• Inicio

Preguntas Frecuentes

1. . A quen vai dirixida?

   A todos os cidadáns e empresas que opten ou deban interactuar coa Seguridade Social por Internet.

2. . Que é a Sede Electrónica da Seguridade Social?

   É o enderezo electrónico dispoñible para que os cidadáns e empresas poidan realizar trámites a través da internet coa Seguridade Social e cuxa titularidade, xestión e administración corresponde por completo á Seguridade Social, órgano ou entidade administrativa no exercicio das súas competencias.

3. . Que servizos ou trámites podo realizar?

   Segundo o perfil, cidadán, empresa e en función do réxime de afiliación á Seguridade Social, terase acceso á presentación de documentación por Rexistro Electrónico, recepción de Notificacións Telemáticas, obtención de Certificados electrónicos e outros servizos que antes requirirían presenza física.

4. . É seguro utilizar os servizos da Sede?

   A comunicación entre o cidadán/empresa e a Sede é segura. Toda a información viaxa cifrada, os Certificados electrónicos garanten a identidade de ambas as dúas partes. Os datos persoais que se envían por Internet están cifrados e, unha vez que son gardados nos sistemas da Seguridade Social, utilízanse os medios necesarios para protexelos, en cumprimento da Lei Orgánica de Protección de Datos de Carácter Persoal e da súa normativa de desenvolvemento.

5. . Cando podo utilizar a Sede Electrónica?

   Poderá acceder a ela e realizar trámites durante 24 horas os 365 días do ano*. É importante sinalar que para trámites nos que se teñan en conta prazos, os realizados en días inhábiles entenderanse efectuados o primeiro día hábil seguinte.
   
   *Algúns servizos da sede poden non estar dispoñibles en determinadas franxas horarias por mantemento técnico.

6. . Que data e hora se teñen en conta para o cómputo de prazos?

   Para o cómputo de prazos en calquera trámite que requira a presentación de documentación, a data e hora oficial da Sede será a que terá validez legal e non a do equipo dende o que se realice. Para estes efectos, terase en conta a de finalización do trámite, cando o cidadán asine a solicitude e/ou documentos e recibe o xustificante correspondente.

   
   Pode acceder ao apartado "Data e Hora oficial" dende o menú inferior da páxina principal da Sede Electrónica.

7. . Teñen a mesma validez as xestións realizadas na Sede que de forma presencial?

   Si, teñen a mesma validez os trámites realizados a través da Sede Electrónica que os efectuados de forma presencial.

8. . Como podo coñecer as novidades da sede?

   Pódese engadir ao navegador a fonte RSS Novidades da Sede Electrónica da Seguridade Social. (Para subscribirse premer en "Subscribirse a esta fonte"). O sistema RSS (Rich Site Summary / Really Simple Syndication) permite recibir a información publicada na Sede Electrónica da Seguridade Social, de xeito sinxelo e gratuíto.

9. . Que é o Rexistro Electrónico de Solicitudes?

   O Rexistro Electrónico de Solicitudes da Seguridade Social está dispoñible unicamente para a presentación de solicitudes relacionadas cos trámites e procedementos que se detallan no Anexo I da resolución vixente, que estean dirixidas aos organismos que compoñen a Seguridade Social.

10. . Como podo acceder aos trámites por Rexistro Electrónico?

    Todos os trámites que permiten a presentación electrónica de solicitudes están situados en “Cidadáns” e “Empresas”, dentro das diferentes categorías que existen en cada unha destas seccións. Móstranse destacados cun logo identificativo.
      
    

    Ademais, na descrición inclúese a información necesaria para a súa presentación. A listaxe de todos os trámites dispoñibles para a súa presentación por Rexistro Electrónico móstrase no  Anexo da Resolución publicada no apartado Normativa e Lexislación / Normativa relativa ao Rexistro Electrónico.

11. . Como coñezo se se tramitou con éxito un procedemento?

    Unha vez realizado o trámite, o usuario obterá un número de rexistro e unha data en pantalla, e unha documentación adxunta consistente nun PDF co resgardo da solicitude e a sinatura do servidor que garante que a transacción se produciu correctamente. Esta mesma mensaxe envíase vía correo electrónico ao enderezo facilitado. Se non se recibe a mensaxe de confirmación ou, se é o caso, se recibe unha mensaxe de erro ou deficiencia da transmisión, deberá realizarse a presentación noutro momento ou utilizando outros medios.

12. . Que é a sinatura electrónica?

    A sinatura electrónica é o conxunto de datos, en forma electrónica, consignados xunto a outros ou asociados con eles que poden ser utilizados como medio de identificación do asinante. É unha cadea de caracteres, xerada mediante un algoritmo matemático, que se obtén utilizando como variables a clave privada e a pegada dixital do texto que hai que asinar de forma que permite asegurar a identidade do asinante e a integridade da mensaxe.

13. . Que documentos emitidos pola Seguridade Social se poden verificar mediante o servizo Verificación de sinaturas e certificados?

    O servizo de verificación de sinaturas e certificados é capaz de validar os distintos PDFs que asina a Seguridade Social, xa sexan polo servizo de TRACI@ss, polo de Notificacións Telemáticas da Seguridade Social (NOTESS) ou por calquera outro que emita sinatura PDF, sempre e cando sexan sinaturas segundo o estándar PDFSignature. Ademais ten a capacidade de poder validar outros documentos en formato binario e XML sempre que cumpran os estándares CAdES.

14. . Que documentos PDF emitidos pola Seguridade Social se poden verificar mediante o servizo Verificación de informes mediante pegada?

    Actualmente só o Certificado de estar ao corrente nas obrigas da Seguridade Social.

15. . Que é un código CEA e como podo verificar a autenticidade dun documento co devandito código?

    CEA é un Código Electrónico de Autenticidade que permite validar a autenticidade daqueles documentos emitidos pola Seguridade Social nos que conste o devandito código. Para comprobar a súa autenticidade está dispoñible o Servizo de verificación de integridade de documentos no que se deberá introducir o Código de Verificación do Documento, a data de xeración do código CEA e os grupos deste que a aplicación precise, sen necesidade de dispoñer de certificado dixital.

16. . Por que non podo acceder aos servizos de SMS?

    Para acceder a estes servizos é necesario ter comunicado á Tesourería Xeral da Seguridade Social un número de teléfono móbil para os efectos de comunicacións, mediante o servizo Comunicación de teléfono e correo electrónico, ou dirixíndose a unha Administración da Seguridade Social.

    
    Ademais, é necesario que os datos que se lle solicitan no formulario de autenticación coincidan exactamente cos rexistrados na Base de Datos da Seguridade Social, así como cumprir co resto de requisitos técnicos.

17. . Ao solicitar o Informe de vida laboral sen certificado dixital, por que non o recibo no meu domicilio?

    Cando se solicita a petición xérase un número de referencia que debe conservar para ver o estado do informe, que pode consultar accedendo a "Consulta de estado de solicitude de Informes", completando os seus datos de identificación e o número de referencia.

    
    Neste servizo indicarase se o envío da vida laboral se realizou ou non, os motivos de que non se realice o envío son porque o enderezo facilitado na petición non se corresponde co que hai nas bases de datos da Seguridade Social (por motivos de seguridade non se realiza o envío), para solucionar este punto deberá acudir a unha administración e actualizar os datos de domicilio.

    
    Ademais, tamén pode obter, imprimir e/ou consultar este informe no mesmo momento da súa petición, a través do acceso con certificado dixital, vía SMS, se previamente comunicou á Tesourería Xeral da Seguridade Social o seu número de teléfono móbil e a través do acceso  Usuario/contrasinal - Cl@ve permanente, se ten activado o usuario e xerado o contrasinal, para o cal deberá dispoñer dun Código de Activación que se obtén de forma presencial en calquera oficina da Seguridade Social, de ámbito nacional.

18. . Podo darme de alta/baixa como autónomo?

    Na Sede Electrónica pódense realizar as solicitudes de alta ou baixa ou variación de datos no Réxime Especial de traballadores autónomos.

    • Alta en RETA
    • Baixa en RETA
    • Variación de datos identificativos

     

19. . Como podo saber as miñas cotizacións á Seguridade Social?

    Dependendo do réxime de cotización, ofrécense dous servizos que permiten a obtención dun informe coas bases de cotización/cotas ingresadas nun determinado período.

    • Informe sobre as bases de cotización, correspondentes aos períodos de liquidación nos que figurou en alta nos diferentes réximes que conforman o Sistema de Seguridade Social.
    • Informe de Bases e Cotos ingresadas en Réximes e/ou Sistemas Especiais, nos que os traballadores teñen a consideración de suxeitos responsables do ingreso de cotas.

    
    Se accede sen certificado dixital poderá cubrir un formulario de solicitude de modo que o informe lle será remitido por correo postal ao domicilio que figure na base da Tesourería Xeral da Seguridade Social.

20. . Podo dar de alta/baixa ou variación dun empregado/a do fogar?

    Si, serán necesarios dous trámites:

    •  Inscrición do empresario.
    • Alta/baixa ou variación de datos de traballadores.

    A documentación que hai que anexar e procedemento detállase nos servizos. Os formularios débense cubrir e anexar. Recoméndase consultar posibles problemas ao gardar o PDF do formulario, nas "Preguntas Técnicas” desta sección.

21. . Desaparición do certificado SILCON

    A partir do 17 de setembro de 2016, eliminarase dos servizos da Sede a posibilidade de acceder con certificado SILCON. Para acceder aos servizos da Sede poderanse utilizar o resto de accesos dispoñibles. Pode acceder á información sobre Certificados dixitais para coñecer aqueles emitidos pola Seguridade Social ou os admitidos doutras Autoridades de Certificación, así como consultar a Listaxe de certificados admitidos.

    Se é usuario do Sistema RED acceda á información dispoñible na Web.

22. . Que configuración debe ter o meu ordenador para utilizar os servizos da Sede?

    A configuración e requisitos técnicos varían dependendo do servizo, se se usa certificado dixital e a plataforma tecnolóxica utilizada para o acceso aos servizos. Pódese obter información en detalle na sección de Requisitos Técnicos.

23. . Como debo configurar o meu ordenador?

    Nas seguintes preguntas desta sección facilítanse en forma de preguntas e respostas os pasos necesarios para a configuración axeitada dos elementos necesarios para o uso da Sede.

24. . Como comprobo o Sistema Operativo do meu ordenador? E a versión Java?

    Se non coñece que sistema operativo ou versións de Java ten instaladas no seu equipo, pode dirixirse ao Manual de configuración dos navegadores para o uso de sinatura electrónica, nos apartados "SABER SISTEMA OPERATIVO INSTALADO NO NOSO EQUIPO" e "SABER VERSIÓN DE JAVA INSTALADA NO NOSO EQUIPO".

25. . En Mozilla Firefox mostra unha mensaxe indicando que a conexión non está verificada

    Pode obter a solución a este problema no Manual de configuración dos navegadores para o uso de sinatura electrónica, no apartado "Confiar no sitio Web" para Mozilla Firefox.

26. . Teño varios certificados instalados, pero ao saír da aplicación e ao volver entrar, sempre me colle os datos do mesmo certificado, que é o primeiro que usei

    Os certificados, ao saír das aplicacións quedan na sesión dos navegadores, polo que para eliminar os datos da sesión e poder entrar na aplicación con outro certificado é necesario pechar todas as ventás do navegador e volver abrilo.

27. . Que soporte lóxico necesito para acceder e asinar na Sede Electrónica?

    O acceso ao proceso de sinatura require da instalación dun único ámbito de execución Java axeitadamente configurado. Debe asegurarse de que non exista máis dun ámbito instalado porque poderían existir conflitos entre as versións e non funcionar a aplicación. Consultar a sección de requisitos técnicos.

28. . Teño problemas á hora de asinar

    Se ten problemas á hora de asinar, primeiro debe asegurarse de cumprir cos requisitos técnicos de soporte lóxico no equipo, a continuación revise o manual de configuración dos navegadores para o uso de sinatura electrónica que contén a configuración necesaria e os problemas de sinatura máis comúns.

29. . Problemas ao asinar con Google Chrome

    A partir da versión 45 de Google Chrome, lanzada o 1 de setembro de 2015, non é posible habilitar o complemento de Java, polo que non se poderán utilizar os servizos web da Sede Electrónica da Seguridade Social que requiran Java co devandito navegador.

    Se utiliza as versións 42, 43 ou 44 de Google Chrome deberá habilitar a funcionalidade de Java para poder utilizar os servizos da Seguridade Social que requiran Java, pode seguir o documento Activación Java en Google Chrome ás versións 42, 43 e 44.

30. . Estou a intentar entrar co meu DNI electrónico e dinme que para poder utilizar o servizo necesito un certificado dos admitidos pola Seguridade Social

    Isto pode acontecer por non ter axeitadamente instalado os controladores do DNIe. Debe ir á páxina www.dnielectronico.es e seguir as instrucións de instalación.

31. . Que é un certificado dixital?

    O Certificado de Usuario é un documento dixital que contén, entre outros, datos identificativos dun suxeito ou entidade. Así, o Certificado dixital permite identificarse en Internet e intercambiar información con outras persoas coa garantía de que só o usuario e o seu interlocutor poden acceder a ela.

32. . Que tipos de certificados existen?

    En función do tipo de solicitante, pódense dividir en:

    • Certificados de Usuario ou persoa física.
    • Certificados de Persoa Xurídica ou Entidade.

    En función do emisor:

    • DNI-e - Emitido pola Dirección Xeral da Policía.
    • FNMT-RCM - Emitidos pola Fábrica Nacional da Moeda e timbre-Real Casa da Moeda.
    • Outros - Emitidos por outras entidades certificadoras recoñecidas.
33. . Que é unha entidade certificadora/autoridade certificadora?

    Unha Autoridade Certificadora (AC, en inglés CA) é unha entidade de confianza do emisor e do receptor dunha comunicación. Esta confianza de ambos os dous nunha 'terceira parte confiable' permite que calquera dos dous confíe á súa vez nos documentos asinados pola Autoridade Certificadora, en particular, nos certificados que identifican ambos os dous extremos.

34. . Que é un certificado de Persoa Física?

    Trátase dun certificado dixital emitido a favor dun suxeito físico (tamén coñecido como certificado de usuario) que vincula o subscritor cuns datos de identidade e sinatura. Subscribe, asina, solicita e custodia as claves da persoa física.

35. . Que é un certificado de Persoa Xurídica ou entidade?

    Trátase dun certificado dixital emitido a favor dunha entidade xurídica que poderá ser utilizado cando se admita nas relacións que manteña a devandita persoa xurídica coas administracións públicas ou na contratación de bens ou servizos que sexan propios ou concernentes ao seu xiro ou tráfico ordinario.

36. . Que é un certificado RAÍZ?

    Un certificado raíz é un certificado emitido pola Autoridade de Certificación para si mesma. Neste certificado consta a clave pública da Autoridade de Certificación e polo tanto será necesario para comprobar a autenticidade de calquera certificado emitido por ela. É o certificado orixe da cadea de confianza.

37. . Que é o certificado raíz da ACGISS?

    Certificado raíz da autoridade de certificación da Seguridade Social, debe ser instalado nos navegadores/java de calquera persoa ou entidade que queira facer uso dos servizos da sede (non é necesario en todos os servizos).

38. . Que é o certificado raíz da FNMT-RCM?

    Certificado raíz da autoridade de certificación da Fábrica Nacional da Moeda e Timbre, adoita vir preinstalado nas distribucións dos navegadores, no caso contrario é necesario instalalo nos navegadores/java de calquera persoa ou entidade que queira facer uso dos servizos da sede. (Non é necesario en todos os servizos aínda que si recomendable para evitar mensaxes de advertencia).

39. . Que período de validez teñen os certificados dixitais?

    O período de validez varía en función do tipo de certificado e a entidade certificadora. Consultar a entidade certificadora ou nos datos de caducidade do certificado que poden consultarse no almacén de certificados do navegador.

40. . Teño que solicitar a renovación do meu certificado dixital ou esta prodúcese automaticamente?

    É un proceso que depende da entidade certificadora.

41. . Que certificados dixitais son admisibles na Sede Electrónica?

    Pode consultalos na lista de certificados admitidos.

42. . Con calquera certificado dixital podo acceder aos mesmos servizos ou trámites?

    Non. Cos Certificados de Persoa Xurídica ou Entidade só se pode acceder a determinados servizos.

43. . Como podo obter un certificado da Fábrica Nacional de Moeda e Timbre- Real Casa da Moeda (FNMT-RCM)?

    Existe unha guía de obtención do certificado na seguinte ligazón.

44. . Como consigo un certificado dixital?

    Dependendo da autoridade certificadora os trámites son distintos, consultar nas páxinas web das distintas autoridades certificadoras. En todas as provincias poden obterse certificados da FNMT-RCM ou DNIe, que serán válidos para os trámites da Sede.

45. . Como se poden exportar e importar os certificados dixitais? Existe algún manual sobre iso?

    Estes son os pasos nos distintos navegadores.

    EXPORTAR CERTIFICADOS INSTALADOS EN INTERNET EXPLORER

    1. Acceder ao Panel de Control de Windows. Para iso ir ao Menú Inicio/Configuración/Panel de Control ou Menú Inicio/Panel de Control dependendo do sistema operativo que leve o ordenador.
    2. Prememos na icona de Opcións de Internet.
    3. Nas pestana de Contidos, premer sobre o botón de Certificados
    4. Seleccionar o certificado e premer o botón "Exportar". Ábrese o asistente para exportar o certificado, premer Seguinte.
    5. Seleccionar Exportar o certificado coa clave privada e premer Seguinte.
    6. Seleccionar o formato do arquivo de exportación.
    7. Introducir a clave privada do certificado. Esta clave non se debe comunicar a ninguén xa que ten que ser secreta. Premer Seguinte.
    8. Premer Examinar, buscar a carpeta onde se quere gardar o certificado, introducir un nome de ficheiro e Gardar.
    9. Premer Seguinte.
    10. Premer Finalizar.
46. . Se teño Chrome ou Linux, como podo descargarme os certificados dixitais?

    O proceso de descarga do certificado depende da entidade certificadora e pode cambiar en función desta. No caso de usar Google Chrome baixo Windows, o proceso de descarga do certificado é igual ao do navegador Internet Explorer posto que comparten o mesmo repositorio de certificados. Consultar as instrucións de descarga de certificados dixitais na páxina web da entidade emisora do certificado.

47. . Podo utilizar o meu certificado instalado noutro ordenador?

    Si, no caso de ter o certificado almacenado nunha tarxeta criptográfica é suficiente con inserir a tarxeta no outro ordenador. Se o certificado está almacenado no navegador, é necesario exportar o certificado a un ficheiro e posteriormente importar o certificado no navegador do novo ordenador.

48. . Podo protexer o meu certificado no navegador?

    Pódese protexer o certificado dixital de dúas formas. A primeira consiste en almacenar o certificado nunha tarxeta criptográfica ou dispositivo seguro (o certificado do DNI electrónico estará almacenado nunha). A outra posibilidade consiste en almacenar o certificado no navegador protexido por un contrasinal especificándoo durante a súa instalación.

49. . Cal debe ser a configuración do meu navegador para poder utilizar o meu certificado dixital na Sede Electrónica da Seguridade?

    Consultar a sección de requisitos técnicos onde se detalla a configuración axeitada para os distintos navegadores.

50. . Por que non me permite o acceso co meu certificado dixital?

    Débese comprobar que o certificado é admitido pola Seguridade Social, que non está caducado ou revogado e que os datos deste coinciden cos datos de identificación, nome e apelidos que hai na base de datos da Seguridade Social.

51. . En que servizos ou trámites podo utilizar o DNI electrónico? Por que non mo recoñece?

    Nos servizos nos que estea habilitado o acceso con certificado dixital. Para a correcta instalación e uso do DNI existe unha páxina web na que se explican os requisitos e se facilitan os drivers requiridos: http://www.dnielectronico.es/

52. . Que diferenzas existen entre "sinatura electrónica" e "codificacións informáticas" cando trato de comprobar a autenticidade dun informe ou certificado emitido pola Seguridade Social?

    As codificacións informáticas son unha serie de códigos alfanuméricos que se basean en datos do informe emitido e un algoritmo matemático, mentres que a sinatura electrónica se basea no uso de certificados dixitais para engadir a un resumo electrónico da totalidade do documento emitido unha clave que só ten o propietario do certificado co que se asina.

53. . Por que non se me permite gardar o formulario nun ficheiro, unha vez cuberto, para a continuación achegalo?

    Isto acontece porque os formularios PDF están preparados para ser imprimidos, a versión gratuíta do visualizador de ficheiros PDF, Adobe Reader, non permite gardar formularios. Esta característica só está incluída na versión Profesional Adobe Acrobat Pro. Se non dispón desta versión existen outras formas de anexar o formulario, son:

    1. Imprimir en impresora o formulario unha vez cuberto e escanear o documento imprimido para o seu posterior envío.
    2. Instalando software gratuíto como QuickPDF, CutePDF que permite instalar un driver de impresora PDF, co que permite que se xere sobre un ficheiro PDF a impresión do formulario. (este novo ficheiro PDF sería o que se debe anexar).
54. . Problemas desdobramento certificados: aparecen en pantalla os certificados que se queren exportar ao navegador, tras introducir o DNIe correspondente, aparecen dous, un de autenticación e outro de forma separada, o cal non é operativo

    Os certificados do DNIe non son exportables a ficheiro por razóns de seguridade, é necesario facer uso do soporte físico (tarxeta DNIe).

55. . Cales son as oficinas de rexistro da Seguridade Social onde podo obter o meu certificado dixital para persoa física?

    Pode consultar a listaxe de oficinas de rexistro da Seguridade Social, unicamente para persoas físicas.

56. . Como podo obter o certificado IZENPE?

    A través da páxina de IZENPE consultar os puntos de atención ao público onde obter o certificado.

57. . En que servizos ou trámites da Sede Electrónica se pode usar o Certificado de Persoa Xurídica?

    Os servizos aos que se pode acceder actualmente co certificado de Persoa Xurídica están detallados na Lista de servizos accesibles con certificados de persoa xurídica ou representante.
    

58. . Podo ter máis dun certificado dixital?

    Si. No almacén de certificados pódense almacenar varios certificados persoais, hai que ter especial coidado que ao realizar os trámites se usa o certificado correcto, tanto en identificación coma en sinatura.

59. . Por que mostra "Atención! Produciuse na páxina 1. Por favor, valide datos da solicitude, se son correctos debe asinar a solicitude, e sen son incorrectos volver á pantalla anterior para corrixilos" se os datos son correctos?

    Nalgúns trámites esta mensaxe prodúcese para reiterar a comprobación dos datos, antes de que estes se asinen e envíen.

60. . Por que non me permite rematar o proceso de solicitude dun trámite no Rexistro Electrónico? Por que me indica o proceso que hai un erro na transmisión?

    É posible que se anexase documentación superior a 10 |Mb ou algún problema coa conexión Internet.

61. . Por que non se xera o arquivo de descarga do informe solicitado? ou Por que me aparece unha ventá que indica ESTASE A XERAR O SEU INFORME?

    Os informes que se xeran "on line" nos servizos con certificado dixital, servizos SMS ou servizos vía usuario/contrasinal na Sede Electrónica teñen o formato PDF e para a súa correcta visualización é necesario ter instalado un visor de PDF, así como permitir as ventás/pestanas emerxentes. Débese comprobar que o software está instalado e que non existen programas bloqueadores de elementos emerxentes.
    
    Tamén é posible que a descarga do informe PDF estea na carpeta de descargas do navegador, débese comprobar esta carpeta.

62. . Teño correctamente instalado o certificado, accedo a outras páxinas Web, pero algúns servizos con certificado da sede non me funcionan

    Débese comprobar que o certificado é admitido pola Seguridade Social e que os datos deste coinciden cos datos de identificación, nome e apelidos coinciden cos que hai na base de datos da Seguridade Social.

63. . Que actos se notifican por vía telemática?

    Os actos de xestión da recadación da Tesouraría Xeral da Seguridade Social obxecto de notificación telemática son os seguintes:

    • Reclamacións de débeda.
    • Providencias de constrinximento.
    • Comunicación do inicio do procedemento de dedución.
    • Actos do procedemento de constrinximento por cotas e conceptos de recadación conxunta e outros recursos.
    • Actos do procedemento administrativo de aprazamento do pagamento de débedas coa Seguridade Social.

    Paulatinamente, iranse incorporando distintas actuacións e procedementos en materia de Seguridade Social cuxas datas de incorporación ao devandito sistema de notificación electrónica se fixarán por resolucións da Secretaría de Estado da Seguridade Social.

64. . Como se pode asegurar a recepción de todas as notificacións que se publiquen en SEDESS?

    É aconsellable que polo menos unha vez cada dez días se acceda á Sede para consultar se existe algunha notificación dispoñible.

65. . Pódese actuar en representación de terceiros?

    Un terceiro non pode actuar en nome dunha empresa ou cidadán para formalizar a subscrición ao Servizo de Notificacións Telemáticas, pero si pode actuar como receptor. A través do Rexistro Electrónico de Apoderamento Telemático (REAT) pódese outorgar poder a un terceiro para a recepción electrónica de notificacións. En todo caso este apoderamento deberá ser outorgado unicamente a unha persoa física ou xurídica.

66. . Cando se despregan os efectos xurídicos da notificación telemática?

    Os efectos xurídicos despregaranse unha vez acepte/rexeite a notificación, independentemente de que o faga a propia empresa, o Autorizado RED, o apoderado ou ben, se rexeite automaticamente por non acceder ao seu contido no prazo de 10 días.

67. . Como se debe actuar ante unha incidencia técnica?

    Consulta as preguntas frecuentes. Se a incidencia persiste conecta co teléfono 901 502 050 (opción 2)

68. . Teño problemas á hora de asinar

    Se ten problemas á hora de asinar, primeiro debe asegurarse de cumprir cos requisitos técnicos de soporte lóxico no equipo, a continuación revise o manual de configuración dos navegadores para o uso de sinatura electrónica que contén a configuración necesaria e os problemas de sinatura máis comúns.

69. . Que soporte lóxico necesito para acceder e asinar as miñas notificacións?

    O acceso ao proceso de sinatura require da instalación dun único ámbito de execución Java. Debe asegurarse de que non exista máis dun instalado porque poderían producirse conflitos entre as versións e polo tanto, non funcionaría a aplicación.

    Pode consultar as versións de ámbito de execución Java válidas na ligazón de "requisitos técnicos" que se encontra en "As miñas Notificacións" na Sede Electrónica da Seguridade Social.

70. . Como se pode designar un terceiro como receptor de notificacións telemáticas?

    O Rexistro Electrónico de Apoderamento Telemático (REAT) establece os procedementos e categorías polas que se pode apoderar un terceiro, entre os que se encontra a recepción de notificacións telemáticas.

71. . Como pode comunicar o interesado que as notificacións se poñan exclusivamente á súa disposición?

    Existen dúas posibilidades:

    • O receptor adicional é o Autorizado RED
      
      Neste caso poderase desasignar este como receptor das súas notificacións a través do Servizo de Desasignación do Autorizado RED como receptor das Notificacións Telemáticas.
      
    • O receptor adicional nun terceiro
      
      Neste caso terá que quitar o apoderamento para este trámite a través do Rexistro Electrónico de Apoderamento Telemático (REAT).
    
    No caso que desasigne o Autorizado RED desta función e, no futuro, se desexe volver designar receptor das notificacións, deberase realizar o trámite a través do Rexistro Electrónico de Apoderamento Telemático (REAT).
72. . Ao comprobar se existen notificacións, aparece este texto na pantalla de consulta: "Non existen notificacións, pero pode que non estea de alta neste servizo". A que se debe?

    Esta mensaxe pode producirse por tres motivos:

    • Non dispón de notificacións pendentes.
    • Superouse o prazo de 10 días de dispoñibilidade en Sede da notificación.
    • Non está subscrito a ningún procedemento.
73. . Se xa se dispón de certificado dixital, débese realizar algún trámite previo adicional para recibir as notificacións telemáticas?

    No caso de que se trate dun suxeito obrigado á notificación telemática, non terá que realizar ningún trámite previo adicional. No prazo dun mes a contar dende o día seguinte da notificación de inclusión, comezará a recibir as súas notificacións por vía telemática.

    No caso de que se trate dun suxeito non obrigado á notificación telemática, primeiro hase de subscribir aos procedementos dos que desexe recibir este tipo de notificación. Esta inscrición pódea realizar a través do Servizo de Subscrición Voluntaria dispoñible na Sede Electrónica da Seguridade Social.

74. . Cantas veces se pode subscribir e dar de baixa un suxeito responsable dos procedementos do Servizo de Subscrición Voluntaria?

    O interesado poderá realizar unha única operación diaria, xa sexa alta ou baixa. Por exemplo, se se subscribe a un procedemento determinado, o sistema non lle permitirá darse de baixa deste ata as 00:00 horas do día seguinte.

75. . Cando se comezan ou se deixan de recibir as Notificacións Telemáticas no caso de subscrición voluntaria a este sistema de notificación ou baixa do servizo?

    Os efectos da subscrición ou baixa entrarán en vigor a partir das 24 horas seguintes á realización da xestión pola que o interesado se subscriba ou se dea de baixa no servizo.

76. . Cando será efectiva a obriga de recibir as notificacións mediante o sistema de notificación telemática?

    No prazo dun mes a contar dende do día seguinte a aquel en que se lle notifique ao obrigado mediante resolución a súa inclusión no sistema de notificación electrónica.

77. . Enviaranse aos interesados algún aviso advertindo da dispoñibilidade de notificacións na Sede Electrónica?

    A Tesouraría Xeral da Seguridade Social enviará, como deferencia cos usuarios, avisos comunicando a dispoñibilidade de notificacións na Sede Electrónica.

    Para suxeitos obrigados á notificación telemática:

    • A través dun correo electrónico á empresa se facilitou un enderezo de correo electrónico.
    • Se existe apoderado, tamén se lle enviará un correo electrónico se facilitou enderezo de correo electrónico.
    • Se non existe apoderado e a empresa non desasignou o autorizado RED como receptor de notificacións, chegaralle aviso a este a través da Winsuite. No caso de que fose usuario do Sistema de RED Directo, tamén se lle comunicará na súa caixa de correo de RED.

    Para suxeitos subscritos voluntariamente á notificación telemática:

    • A través dun correo electrónico á empresa se facilitou un enderezo de correo electrónico.
    • Se existe apoderado, tamén se lle enviará un correo electrónico se facilitou enderezo de correo electrónico.

    Para recibir estes avisos, a empresa e o apoderado deberán facilitar os seus datos de contacto a través do Servizo de Comunicación de Teléfono e Correo Electrónico dispoñible na Sede Electrónica ou de Rexistro Electrónico de Apoderamento Telemático (REAT) respectivamente.

    É importante que a empresa facilite os seus datos e non os do autorizado RED xa que tamén este último recibirá os avisos de posta a disposición de notificacións en Sede a través doutra canle.

78. . Existe algún xeito de recuperar o documento PDF dunha notificación que xa non está dispoñible na Sede Electrónica?

    As notificacións que xa non se encontran dispoñibles na Sede Electrónica (SEDESS) para a súa sinatura por ter finalizado o prazo de dez días naturais para acceder ao seu contido poden consultarse no Histórico de notificacións, integrado dentro do servizo de Consulta e sinatura de notificacións.

    O Histórico de notificacións unicamente permite a busca e consulta de notificacións publicadas na SEDESS nos últimos dous anos. Neste apartado só é posible a consulta de documentos e o seu estado, non a súa sinatura, polo que o acceso ás notificacións non ten ningún efecto xurídico.

    Se se desexa obter información de notificacións recibidas nunha data anterior a dous anos será necesario acudir a unha Administración da Seguridade Social.

79. . Canto tempo permanecen as notificacións electrónicas na Sede Electrónica para a súa sinatura ou rexeitamento?

    Unha vez posta a disposición a notificación ou comunicación en SEDESS, o interesado deberá acceder a ela no prazo de 10 días naturais. Transcorrido este período sen que se acceda ao seu contido, entenderase rexeitada, dándose por cumprido o trámite de notificación e continuándose co procedemento.

    A partir dese momento, e durante os dous anos seguintes, as notificacións mostraranse no Histórico de notificacións, integrado dentro do servizo de Consulta e sinatura de notificacións. Neste apartado só é posible a consulta de documentos e o seu estado, non a súa sinatura, polo que o acceso ás notificacións non ten ningún efecto xurídico. 

80. . Que requisitos técnicos debe ter o equipo para o acceso e sinatura das notificacións?

    Para o acceso e sinatura será necesario cumprir cos requisitos técnicos de soporte lóxico no equipo así como ter configurado o navegador para o uso de funcionalidades de sinatura electrónica.

81. . Como se accede aos Servizos de Subscrición Voluntaria e de Consulta e sinatura de Notificacións Telemáticas?

    Ambos os dous servizos están dispoñibles na Sede Electrónica da Seguridade Social.

    Para os efectos de identificación, os interesados poderán utilizar os certificados electrónicos admitidos pola Administración da Seguridade Social.

82. . Como podo consultar e acceder ás notificacións telemáticas?

    A través do servizo de consulta e sinatura das notificacións, os receptores poderán acceder ao seu contido e asinalas. A Administración da Seguridade Social practicará notificacións electrónicas mediante o sistema de comparecencia na SEDESS.

83. . A que procedementos se pode inscribir o interesado a través do Servizo de Subscrición Voluntaria?

    Existen dous procedementos para a recepción de Notificacións Telemáticas. Cada procedemento está asociado a determinados réximes e sistemas especiais que integran o Sistema de Seguridade Social.
    Os procedementos son:

    • Réximes da Seguridade Social obrigados a RED
      
      

      RÉXIMES DA SEGURIDADE SOCIAL OBRIGADOS A RED

      Réxime Xeral e Sistemas Especiais	Réxime Xeral
      	Artistas
      	Sistema Especial de Froitas, Hortalizas e Industria de Conservas Vexetais
      	Sistema Especial de Manipulado e Empaquetado de Tomate Fresco destinado á exportación
      	Sistema Especial de Traballadores fixos descontinuos de cines, salas de baile e de festa e discotecas
      	Sistema Especial de traballadores fixos descontinuos de empresas de estudo de mercado e opinión pública
      	Servizos Extraordinarios de Hostalaría
      	Sistema Especial de Traballadores Conta Allea Agrarios
      Réximes Especiais
      	Traballadores Autónomos
      	Mar (conta allea)
      	Minaría do Carbón
      	Agrario-empresas (extinto)
      Concerto asistencia sanitaria

      
      
    • Réximes da Seguridade Social non obrigados a RED
      
      
      

      RÉXIMES DA SEGURIDADE SOCIAL NON OBRIGADOS A RED

      Réxime Xeral e Sistemas Especiais	Xogadores de Fútbol (extinto)
      	Ferroviarios (extinto)
      	Profesionais Taurinos
      	Representantes de Comercio
      	Sistema Especial Agrario (Inactividade)
      	Sistema Especial da Industria Resineira
      	Sistema Especial de Empregados de Fogar
      Réximes Especiais
      	Fogar (fixo/descontinuo, extinto)
      	Agrario (conta allea  inactividade/conta propia, extinto)
      	Autores e Escritores de Libros
      	Mar (conta propia, cesamento de actividade)
      	Traballadores Autónomos do Sistema Especial de Traballadores Agrarios (SETA)
      Seguro Escolar, Recursos Diversos e Convenios Especiais

      
      
84. . Quen é o receptor de notificación telemática?

    No caso dos suxeitos obrigados a este sistema de notificación:

    As notificacións poñeranse a disposición en todo caso tanto do suxeito responsable obrigado a recibilas coma do autorizado que en cada momento teña asignada a xestión no Sistema RED do Código de Conta Cotización principal ou, se é o caso, do NAF. Non obstante, os suxeitos responsables poderán optar por ser os únicos receptores das notificacións, desasignando desta función o Autorizado RED a través do servizo en SEDESS para este fin.

    Por outro lado, se o suxeito responsable desexa que un terceiro, distinto do Autorizado RED, sexa receptor tamén das súas notificacións, poderá realizar a xestión a través do Rexistro Electrónico de Apoderamento Telemático (REAT), dispoñible na Sede Electrónica.

    En calquera caso, só pode haber un receptor de notificacións adicional ao suxeito responsable, xa sexa o Autorizado RED ou o apoderado.

    No caso dun suxeito subscrito voluntariamente á notificación telemática:

    O suxeito responsable será sempre receptor das notificacións. Se este desexa nomear un terceiro como receptor adicional das súas notificacións, pode realizar a xestión a través do Rexistro Electrónico de Apoderamento Telemático (REAT), dispoñible na Sede Electrónica.

85. . Podo recibir as notificacións por vía electrónica se non estou obrigado?

    Os suxeitos que non están obrigados á notificación telemática por disposición regulamentaria, poden incorporarse voluntariamente a través do Servizo de Subscrición Voluntaria á recepción por esta vía das notificacións.

    Os suxeitos obrigados que, con anterioridade á entrada en vigor da Orde ESS/485/2013, do 26 de marzo, pola que se regulan as notificacións e comunicacións por medios electrónicos no ámbito da Seguridade Social, se tivesen inscrito a través do Servizo de Subscrición Voluntaria, continuarán recibindo as súas notificacións por tales medios en tanto permanezan subscritos ao devandito servizo, ata que se produza a súa inclusión obrigatoria.

86. . Quen está obrigado a recibir por medios electrónicos a notificación?
    • Empresas e cidadáns obrigados a incorporarse ao Sistema de Remisión Electrónica de Datos (RED), segundo o previsto na Orde ESS/484/2013, do 26 de marzo, pola que se regula o Sistema de Remisión Electrónica de Datos no ámbito da Seguridade Social, con independencia de que os seus Códigos de Conta de Cotización estean de alta ou de baixa:
      • Todas as empresas calquera que sexa a súa actividade, encadradas en calquera dos Réximes do Sistema da Seguridade Social e independentemente do número de traballadores.
      • Traballadores por conta propia ou autónomos, con excepción dos correspondentes ao Sistema Especial de Traballadores por Conta Propia Agrario, que ao mesmo tempo teñan a condición de empresarios obrigados a transmitir polo Sistema RED os datos relativos aos seus traballadores.
      • Empresas e demais suxeitos responsables encadrados nos Sistemas Especiais do Réxime Xeral, agás o sistema especial de empregados de fogar.
    • Empresas e cidadáns que, non estando obrigados ao Sistema RED, se adherisen voluntariamente a este, en tanto sigan inscritos ao citado sistema.
87. . Que é o Servizo de Notificacións Telemáticas?

    É un servizo que permite o acceso en liña ás notificacións que ata agora se recibían por correo postal.

88. . Que é A túa Seguridade Social?

    A túa Seguridade Social é un espazo específico da Sede Electrónica da Seguridade Social no que se inclúen todas as actuacións, procedementos e servizos do Instituto Nacional da Seguridade Social que requiran a autenticación dos cidadáns ou da administración pública nas súas relacións con estes por medios electrónicos.

89. . Que necesito para entrar en A túa Seguridade Social?

    Pódese acceder a "A túa Seguridade Social" utilizando calquera destes sistemas:

    • O número de DNI ou NIE e un contrasinal creado polo propio usuario. Para crear este contrasinal é necesario rexistrarse presencialmente no Rexistro Cl@ve en calquera oficina da Seguridade Social, da Axencia Estatal da Administración Tributaria, do Servizo Público de Emprego ou das Delegacións do Goberno, achegando un número de teléfono móbil e  o enderezo de correo electrónico, xunto co documento de identificación.
    • Un certificado dixital dos incluídos na lista de certificados admitidos.

    Para rexistrarse en CL@VE pódese solicitar CITA PREVIA a través do servizo “Cita Previa para pensións e Outras Prestacións”  ou chamando ao teléfono 901 10 65 70.

    Todas as incidencias sobre o rexistro e o contrasinal cl@ve resólveas o teléfono 060

90. . Que é o usuario Cl@ve?

    Cl@ve é un sistema orientado a unificar e simplificar o acceso electrónico dos cidadáns aos servizos públicos. O seu obxectivo principal é que o cidadán poida identificarse ante a Administración mediante claves previamente concertadas (usuario máis contrasinal), sen ter que recordar claves diferentes para acceder aos distintos servizos.

    Para entrar en A túa Seguridade Social, o usuario cl@ve só é válido se o rexistro foi de nivel avanzado. Para iso, é imprescindible rexistrarse de forma presencial en calquera oficina da Seguridade Social, da Axencia Estatal da Administración Tributaria, do Servizo Público de Emprego ou das Delegacións do Goberno, ou utilizar o certificado dixital ou DNI electrónico no servizo de rexistro da web de Cl@ve.

91. . Podo acceder a A túa Seguridade Social co meu certificado dixital?

    Para acceder a A túa Seguridade Social, podes utilizar calquera certificado dixital dos incluídos en lista de certificados dixitais admitidos.

92. . Teño usuario e contrasinal pero dime que non pode entrar.

    É importante estar seguro de que o usuario cl@ve que estás a utilizar é de nivel avanzado. Para que o usuario sexa de nivel avanzado, é imprescindible terse rexistrado de forma presencial en calquera oficina da Seguridade Social, da Axencia Estatal da Administración Tributaria, do Servizo Público de Emprego ou das Delegacións do Goberno, ou utilizar o certificado dixital ou DNI electrónico no servizo de rexistro da web de Cl@ve.

93. . Ao intentar entrar dáme erro.

    Os problemas de acceso ao portal A túa Seguridade Social poden estar relacionados con  requirimentos técnicos que se deben cumprir, entre outros, os navegadores instalados nos equipos. Podes consultar estes requirimentos mínimos na Sede Electrónica > Inicio > Preguntas frecuentes > Solucións Técnicas, ou ben enviar un correo a través da Caixa de correo de Consultas da páxina Web da Seguridade Social, no asunto Soporte Informático.

94. . Que servizos podo obter de A túa Seguridade Social?

    Os servizos dispoñibles para o cidadán en A túa Seguridade Social actualmente son:

    • Coñecer a idade previsible de xubilación ordinaria.
    • Tempo que falta para poder xubilarse de forma ordinaria.
    • Información sobre os períodos de cotización acreditados para os efectos de prestacións.
    • Información sobre a pensión e as súas contías, así como a obtención de calquera certificado relacionado coa pensión.
    • Certificados da condición de non pensionista.
    • Comprobación do recoñecemento do dereito á asistencia sanitaria do titular e dos seus beneficiarios e obtención do documento que acredita o devandito dereito.
    • Creación e modificación do contrasinal.
    • Solicitude da Tarxeta Sanitaria Europea (TSE), que se enviará a calquera domicilio que nos indique e a obtención, en caso necesario, do Certificado Provisional Substitutorio (CPS) da TSE.
    • Obtención do formulario necesario para ter dereito á prestación de asistencia sanitaria naqueles países europeos nos que se esixe un período previo de cotización.
    • Simulador de xubilación.
    • Inclusión de beneficiarios en asistencia sanitaria ou recuperación dun beneficiario anterior.
    • Pensión de xubilación e morte e supervivencia.
    • Simulador de maternidade/paternidade.
    • Solicitude de maternidade/paternidade.
95. . Aparéceme que teño incidencias nas bases de cotización da vida laboral

    O cálculo da pensión de xubilación en A túa Seguridade Social realízase de xeito automático. Por ese motivo, cando existen períodos na vida laboral ou algunha base de cotización sobre os que é preciso realizar algunha corrección ou axuste manual, ou hai períodos con algún réxime que necesita un tratamento manual (artistas, toureiros, representantes de comercio, sistemas especiais, etc.), o programa non o pode ter en conta e non é capaz de ofrecer un resultado de pensión ao cidadán. Iso non quere dicir que a vida laboral sexa incorrecta ou que non se tomen en consideración esas cotizacións cando se solicite de xeito real a pensión.

    Se está próxima a data da xubilación, podes acudir con cita previa a calquera centro de atención e información da Seguridade Social e solicitar un informativo de xubilación.

96. . Estou a cotizar en Clases Pasivas pero dime que non me calcula a data de xubilación porque actualmente non estou a cotizar á Seguridade Social

    A túa Seguridade Social non ten acceso á información de cotizacións  correspondentes ao ámbito de cobertura do Réxime de Clases Pasivas do Estado (Réximes Especiais dos Funcionarios Civís do Estado, das Forzas Armadas, funcionarios ao servizo da Administración de Xustiza...), polo que non é posible realizar unha simulación nestes casos.

    No momento de solicitar a xubilación polo Sistema de Seguridade Social, deberás acreditar esas cotizacións, a través do certificado correspondente, emitido pola xefatura de persoal na que se prestaron os servizos, para que se teñan en conta os períodos alegados.

97. . Como afecta ao cálculo da pensión o período do servizo militar ou prestación social substitutoria e de que forma o engado?

    Os períodos de servizo militar ou prestación social substitutoria só se computan para alcanzar o período de cotización específico no caso de xubilación anticipada, voluntaria ou involuntaria e co límite máximo dun ano. Por este motivo, só no caso de que esta cotización sexa necesaria, abrirase unha pantalla solicitando que se cubra o período do devandito servizo militar. Se non é necesario, non hai que indicar nada.

98. . O resultado do simulador de xubilación, é un importe neto ou bruto?

    O resultado do cálculo é un importe bruto, aproximado e non vinculante, resultante do cálculo efectuado conforme as bases de cotización, períodos cotizados, idade e circunstancias persoais introducidas.

    No momento no que se solicite a xubilación, aplicaranse ao importe de pensión real resultante as retencións do IRPF correspondentes, conforme a lexislación fiscal en vigor e en función da súa situación persoal e familiar.

99. . Como realiza o simulador de xubilación a integración de lagoas da base reguladora da pensión?

    O cálculo da pensión de xubilación en A túa Seguridade Social realízase de xeito automático. Por iso cando  existen períodos sen cotización e que procede integralos segundo a normativa, o simulador de xubilación fai o seguinte:

    Se no período que haxa de tomarse para o cálculo da base reguladora aparecesen meses durante os cales non existise obriga de cotizar, as primeiras 48 mensualidades integraranse coa base mínima de entre todas as existentes en cada momento.

    O resto de mensualidades co 50 % da devandita base mínima.